بسم الله الرحمن الرحيم
فى يوم من الايام جلست ايمان وميسون يتحدثان عن السعاده
فقالت ايمان لميسون السعاده دى ليها معانى كتير وبتيجى من حاجات كتير
ولكن للاسف فى ظل الماديه المغرقه اللى عايشها الناس بيدوروا عليها غالبا فى الماديات
قال لها ميسون طب ما الماديات دى سبب من اسباب السعاده
قالت لها ايمان فعلا بس سعاده ملهاش جذور
السعاده اللى بجد اللى جذورها الايمان بالله
قالت لها ميسون فعلا فالايمان هو رأس السعاده
قالت لها ايمان تعرفى ان التفكر من العبادات المهجوره بالرغم من انه من اكتر العبادات اللى بتدخلنا على ربنا
وكمان وانتى عايشاه بتحسى بسعاده لا توصف
قالت لها ميسون ازاى بيتعمل؟؟
قالت لها ايمان بحاول احس الكون من حواليا
قالت لها ميسون نعم؟!!!! طب ماكلنا بنحس بالكون من حوالينا
انتى ناسيه ان الاحساس من الحواس الخمسه؟!!
قالت لها ايمان فعلا
بس ممكن اسألك سؤال هتعرفى من خلاله قصدى ايه؟
قالتلها ميسون اسألى اسألى ولا يهمك
قالتلها ايمان عمرك ياميسون حاولتى تحسى بالسماء؟
عمرك حاولتى تحسى بالبحر؟
عمرك حاولتى تحسى بالشجر ؟
عمرك حاولتى تحسى بالنجوم ؟
عمرك حاولتى تحسى بالكون كله حواليكى؟
تحسيهم بعينك وودانك
قالتلها ميسون ايه السؤال الغريب ده؟ هى الحاجات دى بتتحس دى الحاجات دى بتتشاف
قالتلها ايمان بصى فى قول بيقول ايه؟ من ذاق عرف ومن عرف اغترف
قالتلها ميسون حرام عليكى هو انا فهمت الكلام اللى قبل كده علشان افهم الكلام ده ؟
قالتلها ايمان يعنى لو انتى ادركتى شئ جميل مكونتيش تعرفى مقدار جماله مجرد ما تعرفى تبدأى تأخدى منه كتير على قد ما تقدرى
قالتلها ميسون انتى عارفانى بحب اجرب ومعنديش مانع اجرب اللى بتقولى عليه
قالتلها ايمان يلا نجرب سوا
بصى فى السماء ركزى على السماء بعيونك واسمعى اللى هقولك عليه
حسى بالسماء كأنها محوطاكى من كل ناحيه وكأنها حد بيحضنك وخدى من صفائها دخليه قلبك وحسى ان قلبك بقى صافى
وسكتت ايمان وسابت ميسون تعيش حالة التأمل دى
وبعد مده بسيطه لاقت ايمان ميسون بتقولها الله ايه الاحساس الجميل ده
فعلا عندك حق انا اول مره احس واشوف السماء بالطريقه دى
ممكن اجرب حاجه تانيه؟؟
قالتلها ايمان ماشى شكل الموضوع عجبك يالا نتمشى سوا
وبعد شويه قابلوا شجر
قالت ايمان لميسون بصى على الشجر ده وتخيلى السماء اللى وراه بحر وانتى واقفه فيه
وتخيلى فى ايديكى زجاجه حبر اخضر بتنقطى بيها فى الماء
تخيلى الشجره اللى قدامك دى هى نقطه الحبر وعمال تنتشر وبترسم اجمل الاشكال
ومره واحده لاقيت ايمان ميسون بتقول سبحانك يابديع السموات والارض
سبحانك ياخالق يابارئ يامصور ياودود كان ممكن تخلق الكون ابيض واسود بس انت كريم
وانتهت مقابله ايمان بميسون واتفقوا انهم يكرروا الموضوع ده فى اقرب وقت
_ _ _ _ _ _ _ _ _ _ _ _ _
_ _ _ _ _ _ _ _
_ _ _ _
ايه رايكم نتذوق كما تذوقوا ؟؟
ملحوظه القصه دى أغلب احداثها واقعيه يعنى مش خيال الكلام ده وممكن كلنا نعيشه
اهداف القصه
1- الرجوع للروحانيه
2- التعبد لله بالتفكر
3- نعيش الحياه بطريقه واعيه شويه